Рӯӣдодҳо RSS

18.06.2019

Тавре маълум аст, 14 июни соли 2019 дар шаҳри Кӯлоби вилояти Хатлон Форуми байналмилалии сармоягузорӣ – Кӯлоб 2019 баргузор гардид. Кори Форум дар 4 панел гузаронида шуда, аз ҷумла кори панели якум ба мавзӯи “Роҳҳо ва усулҳои такмили сиёсати давлатӣ дар самти сармоягузориву соҳибкорӣ бо мақсади рушди саноатию инноватсионии иқтисодиёти миллӣ” бахшида шуд. Дар он намояндагони мақомоти маҳаллии ҳокимияти далатӣ, бахши хусусӣ ва коршиносон иштирок намуданд.

Раисикунанда, Шерализода Шараф, Роҳбари Котиботи Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ нахуст иштироккунандагонро ба кори панели якуми форум хайрамақдам гуфта, қайд намуд, ки рушди бахши хусусӣ тавассути беҳтар намудани фазои сармоягузорӣ ва дастгирии давлатии соҳибкорӣ яке аз самтҳои муҳимтарини сиёсати созандаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати мамлакат ба ҳисоб рафта, дар даврони истиқлолият дар бахшҳои сармоягузориву соҳибкорӣ ислоҳоти зарурӣ гузаронида шуд.

EF3B3319-158D-4402-A322-A900E516B4F5.jpeg

Вобаста ба ин, як қатор тадбирҳои дар ин самт андешида ва нақшаҳои зерин ёдрас карда шуд:

- тибқи Стратегияи миллии рушди Ҷумҳурии Тоҷикистон барои давраи то соли 2030 муайян гардидани ҳаҷми дурнамои воситаҳо аз рўи ҳамаи сарчашмаҳои маблағгузориҳо, аз 118,1 млрд. доллари ШМА 54,7 млрд. доллари ШМА (46,3 фоиз)-и он ба бахши хусусӣ марбут будан;

- тибқи Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 22 декабри соли 2017 тибқи санадҳои барномавӣ то соли 2020 ду баробар афзоиш додани ҳиссаи бахши хусусӣ дар сармоягузории умумӣ;

- нақши мақомоти иҷроияи ҳокимияти давлатии вилоятҳо ва шаҳру ноҳияҳо дар самти рушди соҳибкорию сармоягузорӣ;

- имтиёзҳои андозию гумрукӣ;

- нишондиҳандаҳои ҳисоботи «Пешбурди соҳибкорӣ»-и Бонки Умумиҷаҳонӣ барои солҳои 2019-2022, тасдиқ аз 2 майи соли 2019, №223 ва ғайра.

Зимни ҷамъбаст, аз ҷумла дар соҳаҳои истеҳсолӣ маводи сохтмон, маъдан, сабук, саноати хӯрокворӣ мавҷуд будани имкониятҳои сармоягузорӣ, дар ин замина мусоидат намудани саноатикунонии босуръати иқтисодиёти Ҷумҳурии Тоҷикистон ҳамчун ҳадафи чоруми миллӣ қайд карда шуд.

Қайд гардид, ки имкониятҳои сармоягузорӣ ва дарёфти роҳҳои муносиби ҳамкориҳо дар вилояти Хатлон низ мавзуи актуалӣ ба ҳисоб рафта, дар ин робита имкониятҳои зиёди сармоягузорӣ дар шаҳри Кӯлоб мавқеи хосса дорад.

Лоиҳаи инкубатсионии акселераторони Тоҷикистон “Accelerate Prosperity” ва фаъолияти Муассисаи давлатии “Ташаккул ва рушди соҳибкорӣ” барои пешбурди бисёр масъалаҳои соҳибкории хурду миёна ва дар ин замина миёни соҳибкорон ба роҳ мондани ҳамкориҳо ва мусоидати ин ташкилот аз масъалаҳои ҷолиб арзёбӣ гардид.

Қобили зикр аст, ки илова ба барномаи кори панели якум тибқи дархост, намояндагони бахши хусусии вилояти Хатлон оид ба мавзуъҳои парвариш ва коркарди гиёҳҳои шифобахш баромад ва ҳамчунин лоиҳаҳои сармоягузориро муаррифӣ намуданд. Дар ин робита таваҷҷуҳи хоссаи иштироккунандагон ба роҳандозӣ ва густариши ҳамкориҳо бо ин соҳибкорон махсус қайд карда шуд.

Дар маҷмуъ вобаста ба баромад ва муаррифиҳои панели якум қайд гардид, ки давлату ҳукумати мо ба ҷалби сармоя ва технология аз ҷониби шарикон барои рушди бахшҳои иқтисодиёт ва таъсиси корхонаҳои муштарак дар ҷумҳурӣ, густариши ҳамкориҳо бо соҳибкорон ҳавасманд буда, омода аст, ки барои пешбурди ин иқдом тамоми шароити муносибро фароҳам орад ва ниятҳои неки ширкату соҳибкоронро дар ин самт ҳамаҷониба дастгирӣ намояд.

Бо ҳамин ба кори панели якум хотима бахшида, ба иштироккунандагони чорабинӣ ҷиҳати иштироки фаъолона изҳори миннатдорӣ ва ба иштироккунандагон барору комёбиҳо баён карда шуд.

14.06.2019

Дар асоси дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба татбиқи тадбирҳо оид ба таъмини рушди босуботи иқтисодии кишвар, баланд бардоштани сатҳи некӯаҳволии мардум, беҳтар намудани фазои соҳибкорӣ ва сармоягузорӣ рӯзи 14 июни соли 2019 дар шаҳри Кӯлоби вилояти Хатлон аз ҷониби Кумитаи давлатии сармоягузорӣ ва идораи амволи давлатӣ дар ҳамкорӣ бо мақомоти иҷроияи ҳокимияти давлатии вилояти Хатлон ва шаҳри Кӯлоб Форуми байналмилалии сармоягузорӣ баргузор гардид.


Дар доираи Форум намоишгоҳи молу маҳсулоти истеҳсолкунандагони маҳаллӣ, намунаҳои эҷодиёти ҳунарҳои мардумӣ ташкил карда шуда, ба маърази иштирокчиёни Форум гузошта шуд.

Дар кори Форум доираи васеи соҳибкорону сармоягузорони ватаниву хориҷӣ, масъулини мақомоти давлатӣ, намояндагони ҳамватанони бурунмарзӣ, мутахассисону коршиносон ва намояндагони васоити ахбори омма иштирок намуданд.


Дар қисмати расмии Форум, ки таҳти роҳбарии Раиси Кумитаи давлатии сармоягузорӣ ва идораи амволи давлатӣ Ҳамрализода Фаррух Маҳмуд баргузор гардид, ёрдамчии Президенти Ҷумҳурии Тоҷикистон оид ба масъалаҳои иқтисодӣ Ашурбой Солеҳзода, муовини Раиси вилояти Хатлон Раҷабалӣ Раҷабов, Раиси шаҳри Кӯлоби вилояти Хатлон Иноятзода Баҳром, Сафири фавқулодда ва мухтори Штатҳои Муттаҳидаи Амрико дар Ҷумҳурии Тоҷикистон Ҷон Марк Паммершайм, Сафири фавқулодда ва мухтори Шоҳигарии Арабистони Саудӣ дар Ҷумҳурии Тоҷикистон Абдулазиз Муҳаммад Ал Бодӣ , директори иҷроияи Корпоратсияи Исломӣ ои ба рушди бахши хусусӣ Айман Амин Сеҷинӣ, Президенти ширкат оид ба захираҳои «Тибет-Эверест» Хуан Цзян Жунг ва муовини волии Балхи Ҷумҳурии Исломии Афғонистон иштирок ва суханронӣ намуданд.




Дар нимаи дуюми рӯз кори Форум дар чор бахши алоҳода дар мавзӯҳои “Роҳҳо ва усулҳои такмили сиёсати давлатӣ дар самти сармоягузориву соҳибкорӣ бо мақсади рушди саноатию инноватсионии иқтисодиёти миллӣ”, “Минтақаҳои озоди иқтисодӣ ҳамчун омили суръатбахши саноатикунонии Ҷумҳурии Тоҷикистон”, “Имкониятҳои рушди соҳибкорӣ дар бахши сайёҳӣ, мавзеҳои таърихиву фарҳангӣ ва ҷалби сармоя ба инфрасохтори сайёҳӣ”, “Имкониятҳои рушди содирот ва коркарди маҳсулоти кишоварзӣ бо истифодаи технологияи муосир” идома ёфт.


Дар доираи Форум як қатор санадҳои дуҷонибаи ҳамкорӣ, аз ҷумла Созишномаи қолабӣ байни Ҳукумати Ҷумҳурии Тоҷикистон ва Корпоратсияи байналмилалии исломӣ оид ба маблағгузории тиҷорат (ITFC)”, “Созишномаи сармоягузорӣ байни Ҳукумати Ҷумҳурии Тоҷикистон ва ширкати дорои масъулияти маҳдуди “Каши Синюй Дади Майнинг”, Ёддошти тафоҳум оид ба татбиқи лоиҳаҳои муштараки сармоягузорӣ бо ширкат оид ба захираҳои «Тибет-Эверест», “Созишнома оид ба ҳамкорӣ байни мақомоти иҷроияи ҳокимияти давлатии шаҳри Кӯлоби вилояти Хатлон ва Ҷамъияти дорои масъулияти маҳдуди “Ориён-Рустам» оид ба сохтмон ва ба истифода додани корхонаи истеҳсоли маҳсулоти хурокворӣ” ва Ёддошти тафоҳум оид ба ҳамкорӣ байни мақомоти иҷроияи ҳокимияти давлатии вилояти Хатлон ва вилояти Балхи Ҷумҳурии Исломии Афғонистон ба имзо расонида шуд.
03.06.2019

Бо мақсади иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар мулоқот бо кормандони мақомоти молия, андоз, гумрук, сармоягузорӣ ва бонкҳои кишвар санаи 10 майи соли ҷорӣ ҷиҳати бартараф намудани камбудиҳои ҷойдошта, дарёфти роҳҳои ҳалли мушкилот, такмили низоми идораи давлатӣ, суботи молиявӣ, беҳтар кардани фазои сармоягузорӣ ва дастгирии соҳибкорӣ иброз доштанд ва татбиқи қарори Ҳукумати Ҷумҳурии Тоҷикистон аз 1 марти соли 2019, №95 «Дар бораи Нақшаи чорабиниҳо оид ба амалӣ намудани 300 рӯзи ислоҳот ҷиҳати дастгирии соҳибкорӣ ва беҳтар намудани фазои сармоягузорӣ дар Ҷумҳурии Тоҷикистон» санаи 3 июни соли 2019 дар Меҳмонхонаи “Ҳайят Реҷенсӣ” дар ҳамкорӣ бо Кумитаи андози назди Ҳукумати Ҷумҳурии Тоҷикистон семинар машварат оид ба муаррифии портали интерактивии соҳибкор бо соҳибкор (В2В) ва рушди хизматрасониҳои электронии мақомоти андоз баргузор гардид.

Семинар машварати мазкурро муовини Раиси Кумитаи давлатии сармоягузорӣ ва идораи амволи давлатӣ муҳтарам Нигина Анварӣ ва муовини якуми Раиси Кумитаи андози назди Ҳукумати Ҷумҳурии Тоҷикистон муҳтарам Солеҳзода Аюбҷон бо сухани ифтитоҳӣ оғоз намуданд.

Қайд гардид, ки аз ҷониби Ҳукумати мамлакат масъалаҳои таҳкими заминаи қонунгузорӣ дар бахши танзими фаъолияти соҳибкорӣ, баланд бардоштани малакаи касбии соҳибкорон, ҳавасмандгардонии истеҳсолкунандагон ва содироткунандагон, тақвият бахшидан ба рушди муколамаи давлат ва бахши хусусию ҷалби сармоягузорӣ, ҳифзи иҷтимоии аҳолӣ, вусъати бозори меҳнат ва тақвияти нерўи инсонӣ мавриди арзёбии доимӣ қарор доранд ва барои ҳаллу фасли онҳо чораҳои мушаххас амалӣ шуда истодаанд.

Дар семинар машварат муаррифномаи портали интерактивии соҳибкор бо соҳибкор (В2В) аз ҷониби роҳбарияти КВД “Тоҷинвест” ва муаррифномаи рушди хизматрасониҳои электронии мақомоти андоз аз ҷониби роҳбарияти КВД “Маркази барномасозии маъмурикунонии андоз” тавассути рунамо ба ҳозирин манзур карда шуд.

Мақсад ва вазифаҳои асосии портали интерактивии соҳибкор бо соҳибкор (В2В) ин беҳдошти фазои соҳибкорӣ, хизматрасониҳо ба соҳибкорони ватанӣ ва хориҷӣ, майдон барои муаррифии ширкатҳо, пешниҳоди захираҳои иттилоотӣ доир ба заминаҳои ҳуқуқӣ ва иқтисодии фаъолияти соҳибкорӣ, иттилоот доир ба имкониятҳои соҳибкорию сармоягузорӣ, хизматрасониҳо дар самти воридоту содирот ва мусоидат дар рушди соҳибкорӣ мебошад. Портал барои дарёфти шарикон, маълумот оид ба шарикони эҳтимолӣ, роҳнамо барои соҳибкорон ва сармоягузорон, дарёфти мол ва хизматрасониҳо, маълумот дар бораи пешбурди соҳибкорӣ ва хизматрасониҳо дар ҷумҳурӣ мусоидат менамояд.

Аз санаи 1 июни соли 2019 Кумитаи андози назди Ҳукумати Ҷумҳурии Тоҷикистон портали хизматрасониҳои электрониро барои андозсупорандагон ҷорӣ намуд. Портали мазкур 36 намуди хизматрасониҳои электронӣ барои андозсупорандагон, ки дар сомонаи расмии Кумитаи андоз ҷойгир карда шуда буданд, дар худ якҷо намуд, ки ин ҷиҳати фароҳам овардани шароити мусоид ба андозсупорандагон ва осон гардонидани истифодаи хизматрасониҳои электронӣ барои иҷрои уҳдадориҳои андозӣ як қадами муваффақ гардид. Ҳамзамон бо итминон метавон гуфт, ки ҷорӣ намудани портали мазкур яке аз механизмҳои пешгирии омилҳои хусусияти коррупсионӣ дошта, ҷиҳати кам кардани муносибати байни андозсупоранда ва корманди мақомоти андоз мусоидат хоҳад кард.

Бояд қайд намуд, ки ба андозсупорандагон аз лаҳзаи бақайдгирӣ то лаҳзаи қатъи фаъолият портали хизматрасониҳои электронии Кумитаи андоз пурра дастрас буда, ҷиҳати иҷрои уҳдадориҳои андозӣ хароҷотҳои молиявӣ ва сарфаи вақт ба андозаи назаррас кам карда шудаанд.

Дар чорабинӣ роҳбарият ва масъулони Кумитаи давлатии сармоягузорӣ ва идораи амволи давлатӣ, Кумитаи андоз, вазорату идораҳо, намояндагони мақомоти иҷроияи ҳокимияти давлатӣ, шарикони рушд, соҳибкорони ватанӣ аз шаҳру ноҳияҳои ҷумҳурӣ ва сармоягузорони хориҷӣ иштирок намуданд.

Баъд аз суханрониҳо ва муаррифномаҳо бахши саволу ҷавоб ва муҳокима мавриди баррасӣ сурат гирифт, ки дар он иштирокчиёни чорабинӣ фаъолона ширкат варзиданд.

02.05.2019

Санаи 29 апрели соли 2019 ҷаласаи зергурӯҳи корӣ оид ба дастрасӣ ба қарзи Гурӯҳи кории салоҳиятноки доимамалкунанда оид ба баланд бардоштани мавқеи кишвар дар арзёбиҳои байналмилалӣ дар назди Кумитаи давлатии сармоягузорӣ ва идораи амволи давлатии Ҷумҳурии Тоҷикистон баргузор гардид.

Дар ҷаласа аъзои зергурӯҳи корӣ оид ба дастрасӣ ба қарзи Гурӯҳи корӣ, инчунин ассосиатсияҳои соҳавӣ ва роҳбарони иттифоқҳои қарзии кишвар иштирок намуданд.

Иштироккунандагон вобаста ба мафҳуми иттифоқҳои қарзӣ ва фондҳои қарзӣ дар қонунгузорӣ, хусусият ва фарқияти куллии онҳо аз муассисаҳои бонкӣ, ба қайди давлатӣ гирифтан ва ҳудуди ниҳоӣ барои азнавбақайдгирии иттифоқҳои қарзӣ ва фондҳои қарзӣ, соддагардонии танзими фаъолият ва ворид намудани онҳо ба номгӯи фаъолияти ғайрисоҳибкорӣ, такмили заминаи қонунгузории фаъолияти иттифоқҳои қарзӣ ва фондҳои қарзӣ, роҳандозии тартиби соддаи ҳисоботдиҳии онҳо, ҷалби маблағҳои мувақаттан озоди онҳо ба низоми бонкии кишвар, аз андозбандӣ озод намудани фаъолияти иттифоқҳои қарзӣ ва фондҳои қарзии дорои ҳаҷми муайяни маблағҳои захиравӣ, дастгирии шарикони рушд дар марҳалаи ибтидоии фаъолияти онҳо, мубодилаи афкор намуданд.

Тавре мушовири калон оид ба масъалаҳои иқтисодии Котиботи Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ - Манучеҳра Мадҷонова қайд намуд, расмигардонии фаъолияти иттифоқҳои қарзӣ барои баланд гардидани мавқеи кишвар дар арзёбии ҳисоботи “Пешбурди соҳибкорӣ” аз рӯи нишондиҳандаи “дастрасӣ ба қарз” аз ҳисоби тавсеаи фарогирии аҳолӣ бо иттилоотии қарзии аз иттифоқҳои қарзӣ дастрасшаванда имконият фароҳам меорад.

Тибқи арзёбии ҳисоботи “Пешбурди соҳибкорӣ” бо вуҷуди аз соли 2013 фаъолият намудани ду бюрои таърихи қарзӣ, сатҳи фарогирии аҳолӣ бо иттилооти қарзӣ 44,9%-и аҳолии калонсоли кишварро ташкил медиҳад, ки дар сатҳи минтақа ин нишондиҳанда ба 42,8% ва дар кишварҳои Аврупо 63,7%-ро ташкил медиҳад. Дар ин радиф роҳандозии мубодилаи иттилооти қарзӣ байни иттифоқҳои қарзӣ ва бюроҳои таърихи қарзӣ метавонад сатҳи фарогирии аҳолии кишварро бо иттилооти қарзӣ ба қадри назаррас васеъ намуда, ҳамзамон мавқеи кишварро дар арзёбиҳои байналмилалӣ баланд намояд.

Натиҷаи муҳокимаҳо ҷамъбаст ва вобаста ба онҳо қарорҳои дахлдор қабул карда шуданд.

05.04.2019

Санаи 3-юми апрели соли 2019 ҷаласаи назди муовини якуми Сарвазири Ҷумҳурии Тоҷикистон оид ба баланд бардоштани мавқеи Тоҷикистон дар арзёбии ҳисоботи «Пешбурди соҳибкорӣ» баргузор гардид.

Дар ҷаласа Ёрдамчии Президенти Ҷумҳурии Тоҷикистон оид ба масъалаҳои иқтисодӣ, роҳбарони вазорату идораҳо ва кумитаҳои давлатӣ иштирок варзида, масъалаҳои баланд бардоштани мавқеи Ҷумҳурии Тоҷикистон дар арзёбии ҳисоботи «Пешбурди соҳибкорӣ»-и Бонки Ҷаҳониро муҳокима ва баррасӣ намуданд.

чаласаи назди М_Я_Сарвазир (1).jpg

Ҷаласаро муовини якуми Сарвазири Ҷумҳурии Тоҷикистон, муҳтарам Давлаталӣ Саид оғоз намуда, қайд кард, ки дар ҷаласаи XIX Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ, Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон супориш доданд, ки бо мақсади ҳалли масъалаҳои ҷорӣ, мушкилоту монеаҳои мавҷудаи соҳибкорону сармоягузорони дохилию хориҷӣ баргузории ҷаласаҳо вобаста ба баррасии вазъи иҷрои қарорҳои Шӯро тадбирҳои зарурӣ андешида шавад.

Пас аз тасдиқи рӯзномаи ҷаласа ва муайян кардани регламенти кори он, муовини якуми Сарвазири Ҷумҳурии Тоҷикистон хотиррасон намуд, ки Пешвои миллат, муҳтарам Эмомалӣ Раҳмон ба масъалаи беҳтар намудани мавқеи Тоҷикистон дар арзёбиҳои байналмилалӣ, бахусус ҳисоботи «Пешбурди соҳибкорӣ» таваҷҷӯҳи хосса зоҳир намуда, тавре дар ҷаласаи XIX Шӯрои машваратӣ иброз доштанд, зарур аст, ки нишондиҳандаҳои рейтингии кишвар дар асоси арзёбии воқеӣ сурат гирифта, ҳама гуна омилҳои субъективӣ бояд аз байн бардошта шаванд.

чаласаи назди м.я.Сарвазир.jpg

Таъкид гардид, ки дар арзёбии ҳисоботи «Пешбурди соҳибкорӣ» масъалаҳои шаффоф ва сода гардонидани расмиёти бақайдгирии субъектҳои соҳибкорӣ, гирифтани иҷозат барои сохтмон, пайвастшавӣ ба шабакаҳои таъмини барқ, андозбандӣ, бақайдгирии моликият, ҳимояи сармоягузорони миноритарӣ, дастрасӣ ба қарз, тиҷорати байналмилалӣ, таъмин намудани иҷрои қарордодҳо ва ҳалли масъалаи пардохтнопазирӣ муҳим буда, роҳбарони вазорату идораҳо бояд дар ин самт бо масъулияти баланд фаъолият намоянд.

Сипас раисикунанда оид ба паст шудани мавқеи кишвар дар арзёбии мазкур нисбат ба кишварҳои ҳамсоя аз рӯи якчанд нишондиҳандаҳо изҳорӣ нигаронӣ намуда, зикр карданд, ки шароити рақобати шадиди минтақавӣ тақвият бахшидани ислоҳоти ҳамаҷонибаро оид ба беҳтар намудани шароити пешбурди соҳибкорӣ ва фазои сармоягузорӣ, аз ҷумла ҷиҳати беҳтар кардани нишондиҳандаҳои мазкур аз ҷониби сохторҳои масъули дахлдор тақозо менамояд.

Тибқи рӯзнома вобаста ба масъалаи якум раиси Кумитаи давлатии сармоягузорӣ ва амволи давлатӣ - Ҳамрализода Фаррух баромад намуд.

Дар баромади худ Ҳамрализода Фаррух вобаста ба самтҳои минбаъдаи ислоҳот ҷиҳати баланд бардоштани мавқеи кишвар дар арзёбии ҳисоботи «Пешбурди соҳибкорӣ», ки дигар арзёбиҳои ташкилотҳои байналмилалӣ аз он сарчашма мегиранд, ва беҳтар намудани фазои сармоягузорӣ ва соҳибкорӣ дар кишвар андешидани як қатор тадбирҳои мушаххасро пешниҳод намуд.

Аз ҷумла қайд карда шуд, ки бо мақсади татбиқи минбаъдаи ислоҳот дар самти соддагардонии расмиёти танзими фаъолияти соҳибкорӣ, беҳтар намудани фазои сармоягузорӣ дар доираи фаъолияти гурӯҳи кории салоҳиятноки доимоамалкунанда оид ба баланд бардоштани мавқеи кишвар дар арзёбиҳои байналмилалӣ, лоиҳаи Нақшаи чорабиниҳои Ҳукумати Ҷумҳурии Тоҷикистон оид ба беҳтар намудани нишондиҳандаҳои ҷумҳурӣ дар ҳисоботи «Пешбурди соҳибкорӣ» барои солҳои 2019-2022 таҳия карда, бо тартиби муқарраргардида 10 декабри соли 2018 барои баррасӣ ба Ҳукумати ҷумҳурӣ пешниҳод карда шуд. Қабул ва татбиқи саривақтии тадбирҳои ислоҳот дар доираи Нақшаи чорабиниҳои мазкур ба муосиргардонии хизматрасониҳои давлатӣ ба доираҳои соҳибкорӣ тавассути ҷорӣ гардидани технологияҳои иттилоотию коммунатсионӣ, баланд шудани сифату тавсеаи номгӯӣ онҳо ва дар натиҷа ба боз ҳам ҷолиб гардидани фазои соҳибкорию сармоягузорӣ дар Тоҷикистон мусоидат менамояд, ки дар навбати худ ба ҷалби сармояи ватанию хориҷӣ ба иқтисодиёти миллӣ, таъсиси корхонаҳои нави соҳибкорӣ, ҷойҳои корӣ ва баланд шудани сатҳу сифати зиндагии аҳолӣ оварда мерасонад.

Ҳамзамон иттилоъ дода шуд, ки 22-26 апрели соли 2019 ташрифи коршиносони Бонки Ҷаҳонӣ барои аз наздик шиносоӣ пайдо намудан бо дастовардҳои ислоҳот дар кишвар дар назар аст. Бинобар ин, ҳамаи мақомоти дахлдори давлатӣ ҷиҳати дар сатҳи баланд қабули коршиносон ва муаррифии дастовардҳои ислоҳот ба онҳо ҳамаҷониба бояд мусоидат намоянд.

Инчунин ҳисоботҳои вазоратҳои адлия, молия, рушди иқтисод ва савдо, энергетика ва захираҳои об, кумитаи давлатии идораи замин ва геодезӣ кумитаи андоз, сохтмон ва меъморӣ, хадамоти гумрук, агентии давлатии суғуртаи иҷтимоӣ ва нафақа ва дигар мақомот оид ба вазъи кунунии ислоҳот ва мушкилоти ҷойдошта дар ин самт шунида шуд.

Зимни ҷамъбасти ҷаласа, ба вазорату идораҳо ҷиҳати бартараф намудани камбудиҳои ҷойдошта, тақвият бахшидани ислоҳоти ҳамаҷониба ва мунтазам ба роҳ мондани корҳои фаҳмондадиҳӣ бо бахши хусусӣ оид ба раванд ва дастовардҳои ислоҳот дастуру супоришҳои дахлдор дода шуд.

29.03.2019
Санаи 19 марти соли 2019 тибқи дастури Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар доираи сафари Президенти Ҷумҳурии Тотористон ба Ҷумҳурии Тоҷикистон дар Муассисаи давлатии “Китобхонаи миллии Тоҷикистон” Форуми соҳибкорони Тоҷикистону Тотористон бо иштироки Сарвазири Ҷумҳурии Тоҷикистон ва Президенти Ҷумҳурии Тотористон баргузор гардид.

Форуми соҳибкоронро - Сарвазири Ҷумҳурии Тоҷикистон муҳтарам Қоҳир Расулзода, Президенти Ҷумҳурии Тотористон муҳтарам Рустам Минниханов ва Сафири фавқулода ва мухтори Федератсияи Россия дар Тоҷикистон Игор Лякин бо сухани ифтитоҳӣ оғоз намуданд.

Қайд гардид, ки Форуми дуҷонибаи соҳибкорон маротибаи аввал бо иштироки Президенти Ҷумҳурии Тотористон баргузор гардида, барои кушодани имкониятҳои фарохи ҳамкорӣ байни соҳибкорону сармоягузорон ва ба роҳ мондани муносибатҳои иқтисодии мутақобилан судманди Тоҷикистону Тотористон мусоидат менамояд.

Дар Форум аз ҷониби Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон муҳтарам Фаррух Ҳамрализода муаррифномаҳо оид ба имкониятҳои сармоягузорӣ дар Тоҷикистон, аз ҷониби муовини Сарвазири Ҷумҳурии Тотористон – Вазири саноат ва савдои Ҷумҳурии Тотористон Альберт Каримов оиди имкониятҳои тиҷоратию иқтисодии Ҷумҳурии Тотористон, инчунин Вазири саноат ва технологияҳои нави Ҷумҳурии Тоҷикистон Заробиддин Файзуллозода, Раиси Палатаи савдо ва саноати Ҷумҳурии Тоҷикистон ва намояндаи ҶСК “КАМАЗ” баромад намуда, тавассути рунамо ба ҳозирин вобаста ба самтҳои ҳамкориҳо муаррифӣ карда шуданд.

Дар чорабинӣ намояндагони зиёда аз 300 ширкату корхонаҳои соҳаҳои гуногуни фаъолияти хоҷагидории Тоҷикистону Тотористон, аз ҷумла истеҳсолкунандагони маҳсулоти саноати бофандагӣ, мошинсозӣ, сохтмон ва меъморӣ, нақлиёт ва коммуникатсия, саноати техникӣ, кишоварзӣ, тандурустӣ, хизматрасониҳои молиявӣ ва сайёҳӣ, роҳбарони вазоратҳои рушди иқтисод ва савдо, саноат ва технологияҳои нав, корҳои хориҷӣ, энергетика ва захираҳои об, кишоварзӣ, Кумитаи давлатии сармоягузорӣ ва идораи амволи давлатӣ, Кумитаи андоз ва Хадамоти гумрук, Кумитаи рушди сайёҳӣ, КВД “Роҳи Оҳани Тоҷикистон”, КВД “Ширкати Алюминийи Тоҷик”, КВД “Тоҷинвест”, Палатаи савдо ва саноат ва дигар корхонаҳои давлатию соҳибкорон, инчунин намояндагони вазорату идораҳои Ҷумҳурии Тотористон низ иштирок намуданд.

Баъдан вохӯрии дуҷонибаи соҳибкорони Тоҷикистону Тотористон, “Соҳибкор бо соҳибкор” (B2B) ва “Соҳибкор бо намояндаи давлат” (В2G) баргузор гардида, масъалаҳои тиҷоратӣ ва ҳамкориҳо мавриди таваҷҷӯҳи байни намояндагони бахши хусусии ҷонибҳо матраҳ карда шуданд.

Дар анҷоми чорабинӣ Ёддошти тафоҳум оид ба ҳамкорӣ байни Палатаи савдо ва саноати Ҷумҳурии Тоҷикистон ва Иттиҳоди Палатаи савдо ва саноати Ҷумҳурии Тотористон ба имзо расонида шуд.

20.02.2019

Имрӯз, таҳти раёсати Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси Шӯрои машваратӣ оид ба беҳтар намудани фазои сармоягузорӣ, муҳтарам Эмомалӣ Раҳмон ҷаласаи XIX Шӯро баргузор гардид.

jalasa.jpg

Зимни баррасии масъалаҳои ҷаласа, Пешвои миллат, муҳтарам Эмомалӣ Раҳмон вобаста ба амалисозии тадбирҳо дар самти васеъ истифода бурдани иқтидорҳои энергетикӣ дар соҳаҳои гуногуни иқтисодиёти ҷумҳурӣ бо шарикони тиҷоратии ҷумҳурӣ ва кишварҳои минтақа, беҳтаршавии мавқеи кишвар дар арзёбии ҳисоботи “Пешбурди соҳибкорӣ”, таҳияи санади меъёрию ҳуқуқӣ оид ба тартиби арзёбии самаранокии имтиёзҳои мавҷуда, тақвият бахшидан ба раванди ҷорӣ намудани технологияҳои пешқадами иттилоотӣ дар фаъолияти мақомоти давлатӣ ва муосиргардонии хизматрасонӣ ва танзими давлатии соҳибкорӣ ва дигар масъалаҳо ибрози назар намуданд.

jalasa2.jpg

Оид ба масъалаи якуми рӯзномаи ҷаласа, рафти иҷрои қарорҳои Шӯрои машваратӣ гузориши Котиби масъули Шӯро, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Ҳамрализода Фаррух шунида шуд.

jalasa3.jpg

Дар робита бо ин дар бораи ба роҳ мондани сабти электронии асноди ҳолати шаҳрвандӣ ва рақамикунонии бойгониҳо, таҳия ва пешниҳоди лоиҳаи Нақшаи чорабиниҳои Ҳукумат оид беҳтар намудани мавқеи кишвар дар арзёбии “Пешбурди соҳибкорӣ”дар таҳрири нав, роҳандозии тартиби мустақими бақайдгирии давлатии шахсони ҳуқуқӣ ва соҳибкорони инфиродӣ, пардохти боҷи давлатӣ барои бақайдгирии давлатии субъектҳои соҳибкорӣ ва андозҳо дар низоми “онлайн” бо истифода аз корти миллӣ, ВИЗА ва МАСТЕРКАРД, фаъол гардидани Системаи электронии Феҳристи ягонаи давлатии уҳдадориҳои гаравӣ барои бақайдгирии гаравҳои молу мулки манқул ва қабули бастаи қонунҳо дар доираи ислоҳоти низоми созишҳои таъминшуда, ворид гардидани тағйиру иловаҳо ба Кодекси андоз ва Кодекси гумрук бо пешниҳоди дар маҷмуъ 30 имтиёзу сабукиҳо барои беҳтар гардидани фазои сармоягузорӣ ва соҳибкорӣ иттилоъ дода шуд.

jalasa4.jpg

Тибқи банди дуюми рӯзнома муаррифии Вазири молияи Ҷумҳурии Тоҷикистон, Қаҳҳорзода Файзиддин оид ба натиҷаҳои таҳлили масъалаҳои низоми андозбандию гумрукӣ ва самаранокии имтиёзҳои пешниҳодшаванда пешниҳод гардид.

jalasa5.jpg

Вобаста ба масъалаи сеюми рӯзномаи ҷаласа, Вазири маориф ва илми Ҷумҳурии Тоҷикистон, Нуриддин Саид роҷеъ ба натиҷаҳои таҳлил оид ба беҳтар намудани фазои сармоягузорӣ ва соҳибкорӣ дар бахши маориф ва илм гузориш дод.

jalasa6.jpg

Оид ба масъалаи ниҳоии рӯзномаи ҷаласа, Котиби масъули Шӯро, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Ҳамрализода Фаррух баромад карда, масъалаҳои таҳлили рушди кластерӣ дар бахши агросаноатӣ ва беҳтар намудани фазои сармоягузорӣ ва бахши технологияҳои иттилоотию телекоммуникатсиониро барои баррасӣ ба ҷаласаҳои оянда пешниҳод намуд, ки аз ҷониби аъзои Шӯро ҷонибдорӣ гардид.

jalasa7.jpg

Ҷиҳати баррасӣ ва муҳокимаи масъалаҳои рӯзномаи ҷаласа, инчунин Вазири адлия, Рустам Шоҳмурод, Роҳбари Намояндагии Барномаи рушди СММ дар Ҷумҳурии Тоҷикистон, Пратибҳа Меҳта, Роҳбари Намояндагии Бонки ҷаҳонӣ дар Тоҷикистон, Раиси Шӯрои ҳамоҳангсозии рушд, Ян Питер Олтерс, Намояндаи Хазинаи кудакони СММ дар Тоҷикистон, Лючиано Колестини, аъзои Шӯрои машваратӣ аз бахши хусусӣ, Директори иҷроияи Иттифоқи ҳунармандони Тоҷикистон, Нигина Икромова, аъзои Шӯрои машваратӣ аз бахши хусусӣ, Директори ҶДММ “Беҳамто”, Исломиддин Ҳакимов, Директори Муассисаи таълимии хусусии “Литсейи Раҳнамо”, Ҳакимниё Илҳомиддин ва дигарон баромад карда, андешаҳои худро вобаста ба масъалаҳои баррасишуда иброз намуданд.

jalasa8.jpg

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси Шӯрои машваратӣ, муҳтарам Эмомалӣ Раҳмон ҷаласаро ҷамъбаст намуда, вобаста ба нуқтаҳои дар он зикргардида ба вазорату идораҳо, масъулини дахлдор дастуру супоришҳо ва ба шарикони рушд тавсияҳои мувофиқ доданд.


04.02.2019

Санаи 1 феврали соли 2019 соати 10:00 дар шаҳри Душанбе дар ҳамкории Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Котиботи Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ, Вазорати адлия, Бонки миллии Тоҷикистон ва дастгирии Гурӯҳи Бонки Ҷаҳонӣ мизи мудаввар, ки ба мавзӯи “Муаррифии дастовардҳои ислоҳоти низоми созишҳои таъминшуда дар Ҷумҳурии Тоҷикистон” баргузор гардид.

Дар чорабинӣ роҳбарияти вазорату идораҳои масъули давлатӣ, коршиносони байналмилалӣ, роҳбарони ташкилоти молиявию қарзӣ, ассосиатсияҳои соҳибкорӣ, мутаххасисони соҳа ва рузноманигорон иштирок карданд.

Мақсад аз баргузор намудани чорабинӣ муаррифии дастовардҳои ин ислоҳот, баланд бардоштани сатҳи огоҳии ҷомеа оид ба муқаррароти қонуни нав, низоми нави бақайдгирии амволи манқул ва аҳамияти иқтисодии он, мавриди истифодаи васеъ қарор додани Феҳрасти ягонаи электронии гарави амволи манқул ҷиҳати ҷорӣ гардидани навгониҳои молиявӣ бо истифода аз амволи манқул ҳамчун гарав, соддагардонии дастрасӣ ба воситаҳои қарзӣ ва эътирофи ислоҳоти ислоҳоти низоми созишҳои таъминшуда дар арзёбии ҳисоботи “Пешбурди соҳибкорӣ” маҳсуб меёбад.

Дар чорабинӣ бо сухани ифтитоҳӣ Вазири адлияи Ҷумҳурии Тоҷикистон, Рустам Шоҳмурод баромад карда, оид ба фаъол гардидани Системаи электронии Феҳрасти ягонаи давлатии уҳдадориҳои гаравӣ барои бақайдгирии гаравҳои молу мулки манқул дар сомонаи www.fehrist.tj ва такмили заминаи қонунгузории ислоҳоти низоми созишҳои таъминишуда маълумоти муфассал доданд.

Ҳамзамон дар чорабинӣ бо сухани ифтитоҳӣ Роҳбари намояндагии Гурӯҳи Бонки Ҷаҳонӣ баромад намуда, вобаста ба дастгирии молиявию техникии ислоҳоти низоми созишҳои таъминшуда дар доираи лоиҳаи “Баланд бардоштани рақобатнокии бахши хусусӣ”-и Гурӯҳи Бонки Ҷаҳонӣ сухан ронданд.

Дар рафти чорабинӣ оид ба аҳамияти иқтисодии Феҳрист барои бахши бонкии кишвар Муовини Раиси Бонки миллии Тоҷикистон, Машрабзода Ҳамидулло, муаррифӣ ва намоиши кори Феҳрист директори ҶДММ “ИСТЕРА”, Саъдуллоев Инъомҷон ва инчунин муаррифии таҷрибаи ҳамкории бонкҳои тиҷоратӣ бо вазорату идораҳои давлатӣ ҷиҳати татбиқи ислоҳоти низоми созишҳои таъминшуда Роҳбари ҶСП “Спитаменбонк”, Самандарзода Навруз баромад карданд.

Баъд аз пешниҳоди гузориш ва муаррифномаҳо бахши саволу ҷавоб ва муҳокимаву баррасӣ сурат гирифт, ки дар он иштирокиёни чорабинӣ фаъолона ширкат варзиданд.

Натиҷаи муҳокимаҳо аз ҷониби раисикунандаи чорабинӣ ҷамъбаст гардида, ҷиҳати таъмини истифодаи самараноки дастовардҳои ислоҳот қарорҳои дахлдор қабул карда шуданд.

18.01.2019

Санаи 15 январи соли 2019, таҳти №181, Фармони Президенти Ҷумҳурии Тоҷикистон «Дар бораи ворид намудани тағйир ба фармони Президенти Ҷумҳурии Тоҷикистон аз 16 январи соли 2018, №990 «Дар бораи эълон намудани мораторий ба ҳама намуди санҷишҳои фаъолияти субъектҳои соҳибкорӣ дар соҳаҳои истеҳсолӣ» ба имзо расид.

Дар ин замина ба ҳама намуди санҷишҳои фаъолияти субъектҳои соҳибкорӣ дар соҳаҳои истеҳсолии Ҷумҳурии Тоҷикистон то 1 январи соли 2021 мораторий эълон карда шуда, муносибатҳои вобаста ба мораторийи эълоншуда дар доираи Қонуни Ҷумҳурии Тоҷикистон «Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ» танзим мегардад.

Қобили қайд аст, ки минбаъд муқаррароти он ба ҳама мақомоти санҷишу назорат ва ҳифзи ҳуқуқ, аз ҷумла Прокуратураи генералӣ, Палатаи ҳисоб, Агентии назорати давлатии молиявӣ ва мубориза бо коррупсия, Бонки миллӣ ва мақомоти андозу гумрук татбиқ карда мешавад.

Бешубҳа, мақсад аз содир гардидани фармони мазкур, ин дастгирии давлатии фаъолияти субъектҳои соҳибкорӣ дар соҳаҳои истеҳсолӣ, ташкили ҷойҳои кории нав, таҳкими иқтидори саноатию содиротии ҷумҳурӣ, кам намудани санҷишҳо ва фароҳам овардани фазои мусоид барои соҳибкориву сармоягузорӣ дар ҷумҳурӣ мебошад.

Ёдовар мешавем, ки масъалаи мазкур дар доираи иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва нишондиҳандаҳои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии Ҷумҳурии Тоҷикистон» аз 26 декабри соли 2018 амалӣ гардидааст.

15.11.2018
Рӯзи 14-уми ноябри соли 2018 дар шаҳри Душанбе, меҳмонхонаи “Ҳаят Реҷенсӣ” бо иштироки ҳайатҳои соҳибкорону коршиносон ва масъулини воломақоми бахши хусусӣ аз кишварҳои Россия, Гурҷистон, Қазоқистон, Ӯзбекистон, Қирғизистон ва Тоҷикистон нишасти коршиносони “Саммити Экосистемаи Стартапҳо” ба кори худ оғоз бахшид.
Чорабинии мазкур бо ташаббуси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Ҷамъияти дорои масъулияти маҳдуди “Машварати иноватсионӣ” ва бахши хусусию шарикони рушд баргузор гардид.
Дар нишасти мазкур ҷонибҳо аслан сари 4 мавзуи меҳварӣ табодули назар намуданд:
  1. Стартап-экосистемаи Осиёи Марказӣ: танзими фазои соҳибкорӣ.
  2. Асосҳо барои рушди систематикии стартапҳо.
  3. Сармоя ва зарфиятҳои молӣ барои стартапҳо.
  4. IT-стартапҳо ҳамчун заминаи аслии иқтисоди рақамӣ.
Мақсад аз баргузории чорабинии мазкур ин баланд бардоштани нерӯ ва сафарбар намудани ҷавонон ба фаъолияти соҳибкорию сармоягузорӣ, баланд бардоштани рақобат бо истифодаи технологияҳои муосир, ҷалби бештари ҷавонон ба соҳибкорӣ ба воситаи муҳайё кардани шароит ҷиҳати рушди “стартап”-ҳо, баррасии имкониятҳои ҳамкории минтақавӣ миёни намояндагони бахши хусусии кишварҳои Осиёи Марказӣ ва ҳамчунин пешбинии амалисозии лоиҳаҳои муштараки тиҷоратӣ миёни соҳибкорони минтақа мебошад.
Барои натиҷагирии фарогир аз чорабинии мазкур, иштироки фаъоли намояндагони мақомоти давлатӣ аз вазорату идораҳои дахлдор, бахши хусусӣ ва шарикони рушд даъват ва таъмин шудааст.
Дар назар аст, ки ҳамчун натиҷаи ҷамъбастии ин нишаст, қарордод дар хусуси ҳамкориҳои минбаъдаи намояндагони бахши хусусии минтақаи Осиёи Марказӣ дар самти соҳибкории технологӣ қабул карда шавад.
Ташаббускорони ин нишаст интизорӣ доранд, ки чорабинии мазкур хусусияти анъанавӣ пайдо карда, ҳамасола дар кишварҳои гуногуни минтақаи Осиёи Марказӣ баргузор хоҳад шуд.


Пешниҳодот ба Шӯрои машваратӣ
Чумҳурии Тоҷикистон, ш. Душанбе, Рудаки 100, ошёнаи 11-ум
Тел.: (+992 44) 610-60-04, тел./факс: (+992 44) 610-60-04, (+992 44) 610-60-09 
Почтаи электронӣ:secretariat@investmentcouncil.tj