20 июн Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Қонуни Ҷумҳурии Тоҷикистон «Дар бораи ҳунармандӣ»-ро ба имзо расониданд.

Қобили қайд аст, ки тибқи банди 9, зербанди 2 Протоколи ҷаласаи ХVII Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ аз 30 январи соли 2017 ба Кумитаи давлатии сармоягузорӣ ва идораи амволи давлатӣ ва Котиботи Шӯрои машваратӣ лоиҳаи Қонуни Ҷумҳурии Тоҷикистон супориш дода шуда буд, ки:

- якҷо бо вазорату идораҳо ва ассотсиатсияҳои соҳибкорон лоиҳаи Қонуни Ҷумҳурии Тоҷикистонро «Дар бораи фаъолияти ҳунармандӣ» таҳия ва ба ҷаласаҳои ояндаи Шӯро пешниҳод намоянд.

Дар ин замина зимни таҳияи лоиҳаи қонун барои соқит намудани калимаи “фаъолияти” мувофиқи мақсад дониста шуд ва Котиботи Шӯрои машваратӣ таҳияи лоиҳаи қонун “Дар бораи ҳунармандӣ”- ро 28 июли соли 2017 ба анҷом расонида ва аз ҳамин сана дар сомонаи Котибот: www.investmentcouncil.tj ҷойгир намуд.

Лоиҳаи қонун минбаъд дар якчанд ҷаласаю мулоқотҳо бо ҳунармандону коршиносон мавриди баррасӣ қарор гирифта, аз натиҷаи онҳо протоколҳо тартиб дода шуд ва якҷо бо лоиҳаи қонун 16 феврали соли 2018 ба Ҳукумати Ҷумҳурии Тоҷикистон ирсол гардид. Дар ин замина ба Кумитаи рушди сайёҳии назди Ҳукумати Ҷумҳурии Тоҷикистон аз 23 феврали соли ҷорӣ барои таъсиси Гурӯҳи корӣ ва таҳияи лоиҳаи Қонуни Ҷумҳурии Тоҷикистон «Дар бораи ҳунармандӣ» супориш дода шуда буд.

Кабл аз баимзорасонӣ лоиҳа имсол дар Маҷлиси намояндагон ва Маҷлиси Миллии Маҷлиси Олии ҷумҳурӣ мавриди баррасӣ қарор гирифт.