Дар ҷаласае, ки дар «Амонатбонк» вобаста ба таъмини иҷрои нишондиҳандаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон доир шуд, таъкид гардид, ки «Паём тамоми самтҳои асосии сиёсати дохилӣ ва хориҷии давлатро фаро гирифта, дар доираи иҷрои нишондиҳандаҳои он бояд масъалаи таъмини саривақтии талаботи иқтисодиёт ба маблағгузорӣ, хусусан қарздиҳӣ ҳамеша дар меҳвари фаъолияти низоми молия ва бонкҳои мамлакат қарор дошта бошад. Зеро ҳар қадар, ки аз ҷониби бонкҳо ва ташкилоти қарзӣ ба аҳолию субъектҳои хоҷагидор қарзҳои дастрас зиёд пешниҳод карда шаванд, суръати рушди соҳаҳои иқтисодиву иҷтимоӣ, инчунин сатҳи зиндагии аҳолӣ беш аз пеш баланд мешавад. Аз ин рӯ, Президенти мамлакат муҳтарам Эмомалӣ Раҳмон дар Паёми навбатӣ ба Бонки миллӣ якҷо бо Вазорати молия, «Амонатбонк» ва «Саноатсодиротбонк» супориш доданд, ки ҷиҳати ҳавасмандгардонии пасандозгузорон ва паст намудани фоизи қарзҳои ба соҳаҳои мухталифи иқтисодиёт, махсусан соҳибкории истеҳсолӣ пешниҳодшаванда, инчунин бо фоизи дастрас афзоиш додани пешниҳоди қарзҳои ипотекӣ чораҷӯӣ намоянд».

Дар робита ба ин супориш аз ҷониби «Амонатбонк» тадбирҳои бетаъхир андешида шуданд ва ташкили се иқдоми қарзии нав аз ҷумлаи онҳо мебошад.

Дар ҷаласа, ки дар он намояндагони Парлумон, роҳбарияту ҳайати кормандони «Амонатбонк» ва масъулини Кумитаи иҷроияи Ҳизби Халқии Демократии Тоҷикистон дар шаҳри Душанбе иштирок намуданд, дар баробари тахлили вазъи ичрои нишондихандахои асосии Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, инчунин фаъолияти солонаи ташкилоти ҳизбии «Амонат»-и Бонки давлатии амонатгузории Ҷумҳурии Тоҷикистон «Амонатбонк» натиҷагирӣ карда шуд.

Таъкид гардид, ки ташкилоти ибтидоии ҳизбии «Амонат» соли гузашта фаъолияти пурсамар намуда, дар самти баланд бардоштани нуфуз ва тақвияти мавқеи ҲХДТ дар ҷомеа корҳое зиёд ба анҷом расонидааст.

Аъзои ташкилоти ҳизбии «Амонат» бо фаъолияти пурсамари худ, фазилатҳои баланди сиёсӣ, сифатҳои наҷиби ахлоқӣ ва фарҳанги баланди маънавӣ ба натиҷаҳои хуби корӣ ноил гардида, дар рушди иқтисодиёти мамлакат саҳми арзанда мегузорад ва дар оянда барои рушди фаъолияти бонкдорӣ ва баланд бардоштани нуфузи ҲХДТ тадбирҳои зарурӣ меандешад.