Шӯроҳои минтақавӣ

Маълумоти умумӣ вобаста ба шуроҳои минтақавӣ

 

Шӯроҳои маҳаллию минтақавии соҳибкорию сармоягузорӣ

 

Шӯроҳои маҳаллию минтақавии соҳибкорию сармоягузорӣ мақоми  машваратӣ ва ҳамоҳангсози самтҳои соҳибкорию сармоягузорӣ буда, фаъолияти худро дар асоси Конститутсияи Ҷумҳурии Тоҷикистон, Қонуни конститутсионии Ҷумҳурии Тоҷикистон «Дар бораи мақомоти маҳаллии ҳокимияти давлатӣ», Қонуни Ҷумҳурии Тоҷикистон «Дар бораи ҳимоя ва дастгирии давлатии соҳибкорӣ», санадҳои меъёрии ҳуқуқии Ҷумҳурии Тоҷикистон, дастуру супоришҳои Раиси Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ, қарорҳои Шӯрои машваратии сатҳи миллӣ ва Низомномаи Шӯрои соҳибкорию сармоягузории назди раис (он) - и Вилояти Мухтори Кӯҳистони Бадахшон (вилояти Хатлон, вилояти Суғд, шаҳру ноҳияҳо) ба роҳ мемонад.

Мақсади асосии Шӯро тавассути фароҳам овардани шароити мусоид ва таъмин намудани муколама ва таҳкими ҳамкориҳои давлат, мақомоти маҳаллии ҳокимияти давлатӣ ва бахши хусусӣ, иштироки фаъолонаи бахши хусусӣ дар раванди баррасӣ ва қабули қарорҳо вобаста ба самти соҳибкорию сармоягузорӣ, рушди фаъолияти соҳибкорӣ, беҳтар намудани фазои сармоягузорӣ, мусоидат ба ҷалби бештари сармоя ба иқтисодиёти маҳал ва дар ин замина мусоидат намудан ба рушди иқтисодӣ, баланд бардоштани сатҳи некуаҳволии сокинони минтақа, ғанӣ гардонидани буҷети маҳаллӣ ва ҷумҳуриявӣ иборат мебошад.

 Вазифаҳои асосии Шӯро иборатанд аз:

- таъмини сатҳи баланди муколамаи доимӣ ва ҳамкориҳои давлат, мақомоти маҳаллии ҳокимияти давлатӣ бо бахши хусусӣ;

- таъмини иштироки фаъолонаи бахши хусусӣ дар раванди баррасӣ ва қабули қарорҳо, стратегияҳо, лоиҳаҳо, консепсияҳо, барномаҳои самти соҳибкорию сармоягузории минтақавӣ ва соҳавӣ, мукаммалгардонии қонунгузории амалкунанда, санадҳои меъёрии ҳуқуқӣ дар сатҳи маҳал оид ба фаъолияти сармоягузорӣ ва соҳибкорӣ;

- баррасӣ, пайгирӣ ва ҳалли пешниҳодот, масъала ва мусоидат ҷиҳати бартараф кардани монеаҳои мавҷудаи фаъолияти соҳибкорию  сармоягузорӣ;

- фароҳам овардани шароит ба ташаббускориҳои бахши хусусӣ, дастгирии ҳамаҷониба ҷиҳати татбиқи онҳо ва зиёд намудани шумораи онҳо;

- мусоидат намудан ба афзоиши  шумораи шаклу намудҳои соҳибкорӣ, ҳаҷми сармоягузориҳо, бахусус сармоягузориҳои мустақим;

- мусоидат намудан ҷиҳати зиёд гардидани шумораи соҳибкорону сармоягузорон, аз ҷумла соҳибкорону сармоягузорони муваффақ;

- баланд бардоштани сатҳи ҳамкориҳо ва шаклҳои гуногуни он бо мақомоти марбутаи давлатӣ дар самти соҳибкорию сармоягузорӣ;

- баланд бардоштани сатҳи огоҳии бахши хусусӣ аз вазъ, нақшаҳо, санадҳои меъёрии ҳуқуқии дар фаъолияти соҳибкорию сармоягузорӣ қабулгардида;

- доир намудани мулоқотҳо бо намояндагони бахши хусусӣ вобаста ба мушкилоту масъалаҳо;

- мусоидати Шӯро ба бахши хусусӣ ҷиҳати аз мақомоту сохторҳои давлатӣ дархост намудани маълумот, санадҳои меъёрии ҳуқуқӣ ва ҳуҷҷатҳои дахлдор ва дастрас намудани онҳо ба бахши хусусӣ.

 

Асосҳои ҳуқуқӣ вобаста ба таъсиси ва фаъолияти шӯроҳои минтақавӣ

                                                               

Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Раиси Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ муҳтарам Эмомалӣ Раҳмон ба масъалаҳои таҳкими раванди муколамаи давлат ва бахши хусусӣ дар Тоҷикистон ва минтақаҳои он, пайгирӣ ва ҳалли масъалаҳои ҷорӣ, мушкилоту монеаҳои мавҷудаи соҳибкорону сармоягузорони дохиливу хориҷӣ, инчунин татбиқи қарорҳои Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ, ки ба ин мақсад равона гардидааст, таваҷҷуҳи хоса зоҳир менамоянд.

Заминаи ҳуқуқии таъсиси Шӯроҳои минтақавию маҳаллиро моддаҳои 17 ва 18-и Қонуни Ҷумҳурии Тоҷикистон “Дар бораи ҳимоя ва дастгирии давлатии соҳибкорӣ” пешбинӣ намуда, вобаста ба ин масъала дар ҷаласаҳои VII, XIV, XV, XVIII, XIX ва XX Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ  ва чорабиниҳои сатҳи олии Президенти мамлакат бо иштироки соҳибкорону сармоягузорон дастуру супоришҳои дахлдор дода шудааст.

Тибқи муқаррароти Қонуни Ҷумҳурии Тоҷикистон «Дар бораи ҳимоя ва дастгирии давлатии соҳибкорӣ»:

Моддаи 17. Ваколатҳои мақомоти иҷроияи маҳаллии ҳокимияти давлатӣ оид ба ҳимоя ва дастгирии давлатии соҳибкорӣ

Ба ваколатҳои   маҳаллии ҳокимияти давлатӣ оид ба ҳимоя ва дастгирии давлатии соҳибкорӣ дохил мешаванд:

- таҳия ва татбиқи барномаи ҳудудии дастгирӣ ва рушди соҳибкорӣ;

- таъсиси шӯроҳои ҳудудӣ оид ба рушди соҳибкорӣ ва беҳтар намудани фазои сармоягузорӣ;

- таъмини рушди инфрасохтори дастгирии соҳибкорӣ дар мақомоти иҷроияи маҳллии ҳокимияти давлатӣ;

- муайян намудани ҳаҷми маблағҳо аз буҷети маҳаллӣ барои татбиқи барномаҳои ҳудудии рушди соҳибкорӣ;

- қабули қарорҳои дахлдор доир ба дастгирии давлатии субъектҳои соҳибкорӣ мутобиқи барномаи ҳудудии рушди соҳибкорӣ.

Моддаи 18. Самтҳои асосии дастгирии давлатии соҳибкорӣ

Дастгирии давлатии соҳибкорӣ дар самтҳои асосии зерин амалӣ мегардад:

- такмили қонунгузории Ҷумҳурии Тоҷикистон оид ба масъалаҳои соҳибкорӣ;

- имконияти озодона амалӣ намудани ҳамаи намудҳои соҳибкорие, ки қонунгузории Ҷумҳурии Тоҷикистон пешбинӣ намудааст;

- ташкили марказҳои дастгирии давлатии соҳибкорӣ, бизнес-инкубаторҳо, паркҳои технологӣ, минтақаҳои озоди иқтисодӣ ва дигар шаклҳои инфрасохтори соҳибкорӣ;

- таъмини методию таълимӣ, илмию методӣ ва иттиллоотии фаъолияти субъектҳои соҳибкорӣ аз ҳисоби Фонди дастгирии давлатии соҳибкорӣ;

- ташкили фаъолияти шӯроҳо оид ба рушди соҳибкорӣ ва беҳтар намудани фазои сармоягузорӣ.

Натиҷаҳо оид ба таъсиси шӯроҳои минтақавӣ

Дар натиҷаи пайгирии масъалаи мазкур, дархости дақиқ ва мушаххаси маълумотҳо оид ба санадҳои қабулгардида ва ҳамкориҳо бо мақомоти иҷроияи ҳокимияти давлатии шаҳру ноҳияҳои ҷумҳурӣ дар ВМКБ, вилоятҳои Хатлон ва Суғд, тамоми шаҳру ноҳияҳои ҷумҳурӣ ва водии Рашт Шӯроҳои маҳаллию минтақавии соҳибкорию сармоягузорӣ таъсис дода шудааст.

Дар ҷаласаҳои Шӯрои машваратии назди Президенти Ҷумҳурии Тоҷикистон оид ба беҳтар намудани фазои сармоягузорӣ то имрӯз:

ду маротиба гузоришҳои Шӯрои машваратии назди Раиси вилояти Хатлон оид ба беҳтар намудани фазои соҳибкорӣ ва сармоягузорӣ (ҷаласаҳои IX, аз 10 апрели соли 2012 ва XIV аз 17 ноябри соли 2014),

ду маротиба гузоришҳои Раиси Шӯрои машваратии назди Раиси вилояти Суғд оид ба беҳтар кардани сармоягузорӣ (ҷаласаи X, аз 19 октябри соли 2012 ва XVIII аз 26 январи соли 2019),

як маротиба гузориши  Раиси Шӯрои машваратӣ оид ба беҳтар намудани фазои сармоягузорӣ ва рушди соҳибкории назди Раиси  Вилояти Мухтори Кӯҳистони Бадахшон, (ҷаласаи XI, 30 апрели соли 2013) шунида, Пешвои миллат, муҳтарам Эмомалӣ Раҳмон барои беҳтару самаранок намудани фаъолияти Шӯроҳои машваратии вилоятӣ дастуру супоришҳо додаанд.

Ҷаласаҳои минтақавии Шӯроҳои рушди соҳибкорӣ ва сармоягузорӣ

 

То имрӯз якчанд ҷаласаҳои минтақавии Шӯроҳои рушди соҳибкорӣ ва сармоягузорӣ дар вилоятҳо ва шаҳру ноҳияҳои ҷумҳурӣ баргузор гардида, дар он масъалаҳои гуногуни соҳибкорию сармоягузорӣ мавриди баррасӣ қарор гирифтааст.

Аз ҷумла, санаи 2 октябри соли 2020 дар ноҳияи Лахш ҷаласаи 6-уми Шӯрои машваратӣ оид ба беҳтар намудани фазои сармоягузорӣ ва соҳибкорӣ дар водии Рашт баргузор гардид.

Қабл аз оғози ҷаласа нахуст Маркази иттилоотӣ ва машваратии соҳибкории ҷавонон ифтитоҳ гардида, инчунин ба Ассосиатсияи хоҷагиҳои деҳқонию фермерии “Самар”-и ноҳияи Лахш мотоблокҳои кишоварзӣ дастрас карда шуд. Мақсади асосии амалисозии лоиҳаҳои мазкур, таъсиси ҷойҳои корӣ, пешниҳоди хизматрасониҳои машваратии соҳибкорӣ ва рушди кишоварзӣ барои ҷавонон ба ҳисоб рафта, дар ҳамкорӣ бо Барномаи рушди СММ дар Тоҷикистон татбиқ мегардад.

Дар ҷаласа роҳбарияти Кумитаи давлатии сармоягузорӣ ва идораи амволи давлатӣ, Котиботи Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ, муовинони раисон, аъзои Шӯро машваратии водӣ, инчунин котибони масъул, аъзои шӯроҳои ноҳияҳои минтақаи Рашт, намояндагони бахши хусусӣ ва шарикони рушд иштирок намуданд.

Тибқи рӯзномаи ҷаласа масъалаҳои имкониятҳои сармоягузориву соҳибкории водии Рашт ва баланд бардоштани иқтидори он, таклифу пешниҳодҳо ба лоиҳаи Барномаи дастгирии давлатӣ ва рушди бахши хусусӣ дар Ҷумҳурии Тоҷикистон барои солҳои 2021-2030, рушди соҳаи коркарди маҳсулот ва афзоиши занҷираи арзиши иловашуда дар водии Рашт ва дигар масъалаҳои масъалаҳои марбут ба рушди соҳибкорӣ, мушкилоти соҳа ва роҳи ҳалли онҳо дар минтақа мавриди баррасӣ қарор дода шуданд.

Дар ҷаласа оид ба масъалаҳои зерин пешниҳодҳо манзур гардид:

- мусоидат ба масъалаҳои таҳия ва пешниҳоди лоиҳаҳои сармоягузорӣ;

- андешидани тадбирҳо ҷиҳати ҷилавгирӣ аз санҷишҳои мунтазам аз ҷониби мақомоти санҷишӣ дар маҳалҳо;

- иштироки сохтор ва мақомоти дахлдори давлатӣ дар ҷаласаҳои Шӯро;

-  мусоидат намудан ба масъалаи тайёр кардани мутахассисон, аз ҷумла дар самти таҳия ва омодасозии лоиҳаҳои сармоягузории соҳибкорони водӣ;

-  ташкили чорабиниҳо дар доираи баргузории ҷаласаҳои шӯро;

- амалисозии тадбирҳо ҷиҳати мақоми байналмилалӣ додан ба гузаргоҳи Қарамиқ;

- мусоидат ба таъсиси корхонаҳо, роҳандозии коркард ва истифодаи маҳсулоти гуногун вобаста ба захираҳои мавҷуда дар водӣ, аз ҷумла мева, пӯсту пашм, гиёҳу набототи табобатӣ,  сангҳои ороишӣ ва ғайра;

- таъмини иштироки роҳбарони аввали ноҳияҳо, ҳамраисон дар кори ҷаласаҳои Шӯро;

- роҳандозии фаъолияти самараноки Шӯрои машваратии водӣ ва ноҳияҳои он.

Протоколи ҷаласаи 6-уми Шӯрои машваратӣ оид ба беҳтар намудани фазои сармоягузорӣ ва соҳибкорӣ ва водии Рашт тасдиқ ва тибқи муқаррароти муайянгардида барои иҷро ирсол гардид.

Инчунин, 23 декабри соли 2020 дар шаҳри Хуҷанд ҷаласаи 4-уми Шӯрои машваратии назди Раиси вилояти Суғд оид ба беҳтар кардани фазои сармоягузорӣ баргузор гардид.

Тибқи рӯзномаи ҷаласа сухани ифтитоҳии Раиси вилоят – Раиси Шӯро, ҳисобот оид ба фаъолияти Шӯро, муаррифии намояндаи Барномаи Рушди Созмони Милали Муттаҳид дар Тоҷикистон оид ба лоиҳаи Барномаи рушди СММ “Мусоидат ба бартараф намудани таъсири иқтисодии COVID-19 тавассути беҳтар намудани шароити зиндагӣ, имкониятҳои шуғл ва ҳамкории минтақавӣ дар водии Фарғона”  шунида, ҳайати нави аъзои Шӯро, Низомномаи Шӯро дар таҳрири нав, нақшаи кории Шӯрои машваратии назди Раиси вилояти Суғд оид ба беҳтар кардани фазои сармоягузорӣ барои соли 2021 тасдиқ карда шуд.

 

Низомномаи   Шӯрои соҳибкориву сармоягузории назди раис (он) – и Вилояти Мухтори Кӯҳистони   Бадахшон  (вилояти Хатлон, вилояти Суғд, шаҳру ноҳияҳо)

 

(Замима мешавад)

 

Бо мақсади таҳкими раванди муколамаи давлат ва бахши хусусӣ дар минтақаҳо лоиҳаи Низомномаи намунавии Шӯрои машваратӣ оид ба рушди соҳибкорӣ ва сармоягузории назди раисони вилоят, шаҳру ноҳияҳотаҳия ва барои тасдиқ ба Раиси  Кумитаи давлатии сармоягузорӣ ва идораи амволи давлатӣ бо мактуби Котиботи Шӯрои машваратӣ пешниҳод карда шуд.

Лоиҳа 22 ноябри соли ҷорӣ ба ҷаласаи 1-уми фосилавии Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ пешниҳод гардид.

Тибқи банди 8 Протоколи №3/22-23 ҷаласаи 1-уми фосилавӣ Низомномаи   Шӯрои соҳибкориву сармоягузории назди раис (он) – и Вилояти Мухтори Кӯҳистони   Бадахшон  (вилояти Хатлон, вилояти Суғд, шаҳру ноҳияҳо) таҳия ва ба мақомоти маҳаллии иҷроияи ҳокимияти давлатии  ВМКБ, вилоятҳои Хатлон ва Суғд, шаҳру ноҳияҳои тобеи марказ аз 22 сентябри соли 2020, №1-1К/2959 (шаҳри Душанбе, ноҳияҳои Ҳисор ва Рашт аз ҳамин сана, №1-1К/2958) исрол карда шуд.

Айни замон раванди дар таҳрири нав таҳия ва тасдиқи низомномаҳои Шӯроҳои маҳаллию минтақавии соҳибкорию сармоягузорӣ оғоз шудааст.

Манбаъҳои муфид