Шӯрои машваратӣ

Маълумоти мухтасар

Шӯрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ ( Шӯрои машваратӣ) мақоми машваратӣ дар назди Президенти Ҷумҳурии Тоҷикистон мебошад. Шӯрои машваратӣ майдони муҳимтарини гуфтугӯи байни давлат ва бахши хусусӣ ба ҳисоб рафта, дар ташаккули сиёсати давлатӣ вобаста ба рушди соҳибкорӣ ва беҳтар намудани фазои сармоягузорӣ дар Ҷумҳурии Тоҷикистон мусоидат менамояд. Шӯрои машваратӣ дар асоси таҳлилу тавсияҳо ва пешниҳодоти заруриро ба Президенти Ҷумҳурии Тоҷикистон - Раиси Шӯрои машваратӣ ва Ҳукумати Ҷумҳурии Тоҷикистон ва дигар мақомоти давлатӣ манзур менамояд.

Шӯрои машваратӣ дар фаъолияти худ Конститутсияи Ҷумҳурии Тоҷикистон, қонунҳои бо роҳи раъйпурсии умумихалқӣ қабулгардида, санадҳои ҳуқуқии байналмилалие, ки Тоҷикистон онҳоро эътироф кардааст, қонунҳои конститутсионӣ, кодексҳо, қонунҳо, қарорҳои якҷояи Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, қарорҳои Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, фармонҳои Президенти Ҷумҳурии Тоҷикистон, қарорҳои Ҳукумати Ҷумҳурии Тоҷикистон ва Низомномаи мазкурро ба роҳбарӣ мегирад.

МАҚСАД ВА ВАЗИФАҲОИ ШӮРО

Мақсади асосии Шӯрои машваратӣ таъмини муколамаи давлат ва бахши хусусӣ, рушди фаъолияти соҳибкорӣ, беҳтар намудани фазои сармоягузорӣ, инчунин мусоидат ба рушди иқтисодӣ, баланд бардоштани сатҳи некуаҳволии аҳолӣ, бартараф намудани душвориҳо ва саддҳои асосии рушди соҳибкорию сармоягузорӣ дар мамлакат мебошад.

Вазифаҳои Шӯрои машваратӣ:

  • таъмини муколамаи доимӣ ва ба роҳ мондани ҳамкориҳо миёни давлат ва бахши хусусӣ, вобаста ба пешбурди масъалаҳои соҳибкорию сармоягузорӣ дар ҷумҳурӣ;
  • гузарондани тадқиқот ва таҳлили масълаҳои оид ба фаъолияти соҳибкорӣ ва фазои сармоягузорӣ дар мамлакат;
  • таҳияи пешниҳодҳо ва тавсияҳо ба Президенти Ҷумҳурии Тоҷикистон-Раиси Шӯрои машваратӣ ва Ҳукумати Ҷумҳурии Тоҷикистон ва дигар мақомоти давлатӣ оид ба беҳтар намудани фазои сармоягузорӣ ва фаъолияти соҳибкорӣ;
  • таҳияи пешниҳодҳо оид ба ислоҳоти низоми идоракунии давлатӣ, такмили қонунгузории амалкунанда бо мақсади мукаммалгардонии вазифаҳои танзимкунандаи давлат дар самти рушди фаъолияти соҳибкорӣ ва беҳтар намудани фазои сармоягузорӣ;
  • омодасозии пешниҳод ва тавсияҳо оид ба лоиҳаҳо, консепсияҳо, стратегияҳои рушди иқтисодию иҷтимоии кишвар ва муайян намудани самтҳои афзалиятноки ҷалби сармоягузориҳо.

Манбаъҳои муфид